consellos para rapazolas

www.huffingtonpost.com
capa da reedición en inglés

Mark Twain, 1867

as rapazas boas non deberían facer pucheiros aos seus profesores por cada pequena ofensa. Só se debería recorrer a esta represalia baixo circunstancias especialmente graves

se non tes máis que unha boneca farrapenta rechea de serraduras, mentres que unha das túas ‘compas’ de xogos, máis afortunada, ten unha cara de porcelana, deberías, sen embargo, tratala con marcada amabilidade. E non deberías tentar forzala a cambialas a non ser que a túa conciencia cho xustifique, e saibas que es quen de facelo

nunca deberías quitarlle á forza a goma de mascar ao teu irmanciño; é mellor engaiolalo coa promesa dos dous primeiros dous dólares e medio que atopes flotando no río enriba dunha pedra de afiar. Coa simpleza inocente connatural a estas idades, considerarao unha transacción perfectamente xusta. En todas as épocas do mundo esta ficción eminentemente plausible ten atraído o infante obtuso á ruína e desastre financeiros

se a calquera hora ves necesario corrixir a teu irmán, non o fagas con lama – nunca, baixo ningunha circunstancia, lle botes lama, porque lixaraslle a roupa. É mellor escaldalo un chisco con auga quente, pois deste xeito obterás o que desexas. Asegúraste a súa atención inmediata ás leccións que lle estás a inculcar, e ao mesmo tempo a auga quente tenderá a eliminar as impurezas da súa persoa, e posiblemente a pel, a tiras

se túa nai che manda facer algo, equivócaste ao negarte. É mellor e máis atractivo facerlle entender que farás como che di, e logo actuar tranquilamente na materia segundo os ditados do teu mellor xuízo

sempre deberías ter presente que é aos teus amables proxenitores a quen debes a túa comida, ou o privilexio de quedar en casa cando deixas caer que te atopas mal. Polo tanto, deberías respectar os seus pequenos caprichos, e rirlle algo as grazas, e soportar as súas pequenas pexas ata que se comecen a exceder

as rapazolas boas sempre deberían ter especial deferencia cara a xente de idade. Nunca deberías ‘ser pillabana’ con eles a menos que eles ‘sexan pillabáns’ primeiro

tradución mala: @xindiriz

[©] lalín 2014

texto orixinal

wikipedia (english)